Қоқысқа көмілетін болдық! Осылай деген Ясное-2 елді мекенінің тұрғындары жауапты мекемелерге талай хабарласқандарын айтты. Бірақ айдан асса да ауылдың қоқысы шығарылмаған. Тұрғындар қап-қап қоқысты аулаға жинап отыр. Өртеп жіберуге, айыппұл салады деп қорқады. Жақын маңда тұрмыстық қалдықтарды төгетін жер жоқ. Қапқа түйілген қалдықты аула сыртына шығарса, қаңғыбас иттер шашып кетеді. Тұрғындардың уақытылы қызмет көрсетпейтін мекемеге өкпелері қара қазандай. Ал қалдықтар екі айдан бері алынбаса да, тұрғындар қызмет ақысын уақытылы төлеп отыр.
Нұрлан Сейсенғалиев бұл жерде 12 жылдан бері тұрады. Айтуынша, бұған дейін мұндай мәселе болмаған. Қоқыс аптасына екі рет шығарылып тұрған. Қоңырау шалған ауылдың үлкендерін "ертеңмен" тойдырған мекеме өкілдері, соңғы уақытта телефон тұтқасын көтермейтін болған. Қаладағы қатты қалдықтарды жинап-шығарумен айналысатын "NeoPLUS" жауапкершілігі шектеулі серіктестігі Ясное-1, Ясное-2 елді мекендерінің қоқыстары ертең шығарылатынын жеткізді.Сондай-ақ, елді мекен тұрғындары қоқысты аңдыған бұралқы иттер қаптағалы мектепке баратын балалар үшін алаңдайтындарын да айтты.