Тергеу изоляторында 28 жастағы күдікті Данияр Кенжалин аштық жариялады. Он күннен бері нәр татпаған жігіт тергеу әділетсіз жүргізілді, маған жала жабылды, деп наразылық танытуда. Бүгін біздің телеарнамызға сұхбат берген оның анасы да ұлының кінәсіз екенін алға тартты. Бақыткүл Бақаева тергеу амалдары басынан әділетсіз жүргізілді деп налиды. Соған наразы оның ұлы Данияр Кенжалин тергеу қапасында 10 күннен бері нәр татпаған. Аштық жариялап жатқан жігіт құқық қорғаушылар істі қайта қарап, ақ-қарасын анықтамаса, наразылығын тоқтатпайтынын айтыпты. Бірақ, 28 жастағы күдіктінің денсаулығы сыр бере бастағанға ұқсайды. Ол бірнеше күннен бері су да ішпеген.
Өткен жылдың қыркүйек айында Данияр Кенжалин адам өлтірді деген күдікпен қамауға алынады. Шанхай ауданындағы дәмханалардың бірінен мас күйінде көлікке отырған төрт жігіт жол-жөнекей ерегесіп қалады. Ақырында саяжайға барған жігіттердің төбелесінен 27 жастағы қала тұрғыны көз жұмады. Оқиға куәгерлерінен жауап алынып, кісі өліміне басты күдікті ретінде Данияр Кенжалин қамауға алынады. Бірақ күдіктінің анасы ұлының кісі өлтірмегенін, ол төбелескендерді арашаламақ болғанын айтады. Қасындағы екі жігіт балама жала жапты, деп налиды. Облыстық полиция департаменті істі тергеуді аяқтаған.
Топтық төбелестен соң күдікті Данияр Кенжалиннің үстінен алғашында ҚР ҚК "Денсаулыққа қасақана ауыр зиян келтіру" бабы бойынша іс қозғалған. Бірнеше күннен соң жәбірленуші ауруханада көз жұмып, күдіктінің айыбы "бұзақылық ниетпен адам өлтіру" бабына ауыстырылады. Ал, тергеу изоляторында аштық жариялап жатқан күдіктінің анасы тергеу амалдарымен келіспейді. Тергеу қайта жүргізілмесе, балам аштық жариялауын тоқтатпауы мүмкін, деді.