Ауа райының қолайсыздығына байланысты өңірдің барлық жолдары жабылды. Сырт қана емес қаланың іші де борап жатыр. Таңертеңнен жауған ақ ұлпа жолдарды басып қалған. Ауа-райының күрт бұзылуына байланысты республикалық, ауданаралық бағыттардың барлығы жабылды. Қаладан шығатын жолдарда әкімшілік полиция басқармасының қызметкерлері күні-түні кезекшілікте.
Қалың жауған қар мен бораннан ештеңе көрінбеуіне байланысты жол сақшылары қаланың ішінде де қауіпсіздікті сақтауға кеңес береді. Ауа райының қолайсыздығынан көліктердің түйісуі жиілеген. Облыстық төтенше жағдайлар департаментінен хабарланғандай, бұрқасынға байланысты Самара - Шымкент, Қарабұтақ - Комсомол, Ақтөбе - Ор, Қандыағаш-Ембі-Шалқар-Ырғыз тас жолдары жабылды. Жолдарға қатысты өзге де мәліметтерді "112" нөмірі арқылы сұрап білуге болады.