12-ші мөлтек аудандағы №50 "Г","Д", "Е" үйлерінің тұрғындары тұрғызылғалы жатқан дүкенмен көрші болғылары келмейді. Тоғыз қатарлы үйлердің қасынан 3 қатарлы ет өндірісі дүкенінің құрылысы басталмақ. Төменгі қабаттардың тұрғындары ол салынса, тереземізді күннің көзінен көлегейледі дейді. Жүрер жеріміз де тарылатын болды, деп қынжылыс білдірді кейбірі. Тұрғындардың мазасын қашырған дүкен әлі салынған жоқ. Құрылыс алаңына қазықтар қағылған. Жаңадан пайда болатын нысанның иесі бұл маң халқымен әлі тілдеспеген.
Халықтың айтуынша, бұл жерде ет өнімдерін сататын дүкен мен цех орналаспақ. Ғимарат биіктігі 12 метр. Салынатын нысан үшінші қабатқа дейінгі пәтерлерді күннің көзінен көлегейлейді. Сондай-ақ, тұрғындар көліктерден аяқ алып жүру мүмкін болмай қалады, деп тыныштықтарының да бұзылатынына алаңдаулы. Құрылысқа түбегейлі қарсы шыққан тұрғындар қаланың қасбетіне жауапты мекемеге арыздарын жолдауға бекінген. Заң органдарына да үшбу хат жазып қойған. Бүтіндей бір үй тұрғындары қарсылық қағаздарына қолдарын қойып берген. Мекемеден белгілі болғандай, аталған құрылысқа ешқандай рұқсат берілмеген болып шықты. Яғни, тұрғындардың арызы бойынша аталған жерде тексеру жұмыстары жүргізілмек. Заңбұзушылықтар анықталатын болса, құрылыс алаңы бірден сүріледі.