Аула іргесіндегі тынымсыз жұмысқа қарсымыз! Бүгін шаһардың басты даңғылындағы бірнеше көпқабатты үйдің тұрғындары наразылыққа шықты. Жұртшылық бір аптадан бері үздіксіз жүргізіліп жатқан құрылыс жұмыстары мазамызды әбден қашырды, ешқандай техникалық қауіпсіздік сақталмаған деген уәж айтады. Жұмысы қызу жүріп жатқан құрылыстың құжатында бұл жерде екі қатарлы гүл салоны тұрғызылатыны көрсетілген. Тұрғындар жаңа нысанның бой көтеруін құптамай отыр.Әбілқайыр хан даңғылындағы №27,27 "А", 31-ші үйлердің тұрғындары бұл құрылыстың жүргізілуіне түбегейлі қарсы. Айтуларынша, күні-түні даңғыл бойымен жүйткіп жататын көліктер мазаларын қашырып болған. Қазірдің өзінде қарсы бетте тұрған супермаркетке келетін көліктер үй аулаларын әбден автотұраққа айналдырып алған. Енді тағы бір нысан пайда болатын болса, жағдай ушығады, дейді тұрғындар. Олар қалабасы атына арыз жазған. Асхат Шахаров оған екі апта ішінде жауап беруге жазбаша түрде уәде беріпті.
Көршісінің сөзін жалғастырған Айбек Ақшолақовтың балалық шағы осы аулада өткен. Көше басты даңғылға айналғалы бұл маңда балаларды алаңсыз ойынға жіберу қауіпті. Бірде болмаса бірде көліктер қағып кетуі мүмкін дейді ол. Өткен аптадан бері қызу жүріп жатқан құрылысқа- мердігер "Ұлан" компаниясы жауапты. Шаһарда бірнеше жылдан бері қарқынды жобалар жасап жүрген компания 161 шақырым аумақты қамтитын екі қатарлы, әйнекті нысанды 5 айда тұрғызып беруге уәде еткен. Тапсырыс берушінің аты-жөнін айтудан бас тартқан жауапты маман жұмыс жасау барысында техникалық қауіпсіздік мәселесі толық сақталғанын айтты. Тапсырыс беруші жақ қалалық әкімдікпен үш жақты жасалған келісімшартты ұсынған. Алдын ала жасалған сызбада нысанның айналасы абаттандырылатыны көрсетілген. Құрылыс барысында сүрілген ағаштардың орнына жаңадан көшеттер отырғызылады. Көлік тұрағы да қарастырылған.