Елімізде «Тұрғын үй қатынастары туралы» заңға өзгертулер енгізу көзделіп отыр. Соның аясында тұрғын үйлерді басқару құрылымы мен қызметі өзгермек. Алдағы уақытта пәтер иелері кооперативтері мен кондоминиум жұмысы меншік иелері бірлестігіне өтуі мүмкін. Егер меншік иелері бірлестігі құрылса, пәтер иелері кооперативтері немесе кондоминиумдар өз жұмысын тоқтатады. Заң аясында әрбір үйдің өз алдына жеке есепшоттары болады. Оның бірі үйді күтіп ұстауға, ал екінші есепшот сол үйге күрделі жөндеу жұмыстарын жүргізу үшін ашылады. Соған байланысты тұрғындар қаржы жинайтын болады. Набережный көшесінің бойындағы бұл көпқабатты үйді күтіп ұстау жұмыстары жаңадан құрылған бірлестікке тапсырылады.
Тұрғындар коммуналдық проблемаларға қатысты жұмыстардың барлығы заң аясында шешіліп, реттелетінінен хабардар. Бастама қолдау да тауып отыр. Түсіндіру жұмыстары бірқатар үйлерде жүргізілген. Бұл уақытқа дейін бір пәтер иелері кооперативі шамамен 10 үйді басқарып келген болатын. Осындай жағдайлар тұрғындар арасында көбінесе кикілжің туғызады. Заң қабылданса, тұрғын үйлер бір ғана басқарушы органға тәуелді болады. Бір үйден тағайындалған жетекші адам сервистік компаниялармен келісімшарт жасасып, барлық істі заңдастырып отырады. Мұның артықшылығы — тұрғын үй мәселесіне қатысты барлық іс ашық, жария түрде жүргізіледі. Яғни бір үйдің есепшотына түскен қаражат сол үйдің қажетіне ғана жұмсалатын болады.