Бүгін елде жас түлектерге аттестат тапсыру салтанаты өтті. Қаладағы Әбіш Кекілбаев атындағы №72 жалпы білім беретін IT мектеп-лицейінің түлектері де алтын ұя мектебімен қоштасты. Білім ордасының ауласында қаз-қатар сап түзеген 19 қыз-жігіт екі жарым ай бойы көрмеген ұстаздарымен естелік суретке түсті. Мектеп, ұстаздар тақырыбында әндер шырқалды. Төменгі сынып оқушылары аға-апаларына ақ жол тіледі. Осыдан екі жыл бұрын ашылған мектеп-лицейдің бұл алғашқы түлектері. Жас түлектердің арасынан Расул Амантай жалғыз «Алтын белгі» иегері атанды.
Расул Амантаймен бірге білім ордасын 18 түлек аяқтады. Екі жыл бұрын ғана іргесі қаланған IT мектеп-лицейі шаһардағы таңдаулы орындардың бірі. Себебі мұнда оқушыларға робот құрастыру дәрістері көбірек әрі сапалы үйретіледі. Сол себептен болар бүгінгі түлектердің басым бөлігі болашақ мамандықтарын осы саладан таңдауды ұйғарыпты. Алтын ұя мектебімен қимай қоштасқан түлектерді санаулы күндерден соң ұлттық бірыңғай тестілеу күтіп тұр. Түлектер білім сынағына тынбай дайындалып жатыр. Айтуларынша, тест жаттауға қазір уақыт жеткілікті. Себебі салтанат кештері өтпейді. Оған дайындалып уақыт жоғалтпайды. Түлектердің білімдерін қайтара тексеріп алуға мүмкіндіктері мол.