Сынып жетекшілерінің қауымдастығын құру қажет пе? Ғаламтордың оқушылар үшін пайдасы мен зияны қандай? Сынып жетекшілерінің жүктемесін азайту мүмкін бе? Осы және өзге де мәселелер бүгін облыстық класс жетекшілерінің слетінде талқыға түсті. Слет педагогикалық ринг түрінде өткізілді. Оған тұңғыш рет ұстаздармен бірге тәуелсіз сарапшылар, оқушылар мен олардың ата-аналары қатысты. Педагогтар осылайша үш жақты пікірді ескеріп, 2012-2015 жылдарға арналған мектепте тәрбие берудің типтік жоспарын әзірлеп алмақшы. Семинар барысында мектеп бітіру кештерін өткізудің жаңаша үлгілері, суицид синдромы, әлеуметтік жетімдік сияқты қоғамдық өткір мәселелер де тілге тиек етілді. Сондай-ақ, облыстың әр ауданынан келген сынып жетекшілері өз жобаларын қорғады. Бүгін "Ең үздік мектеп-лагері" байқауының жеңімпазы анықталды. Бұл атаққа Шалқар ауданындағы ¹7 мектептің "Гүлдер" лагері лайықты деп танылған.