Суағары жоқ көше көп

Жыл басында еліміздегі бірқатар аймақта су басу қаупі туындап тұрғаны ес­кер­тілді. Оған дайындық шара­лары жоғары деңгейде жүр­гізіліп жатқаны да айтылды. Айтса айтқандай, көктем өңірімізде аласапыранмен бас­талды. Жаңбыр жауып, оған еріген қар суы қосылып қала мен бірқа­тар елді мекендер тас­қын су­дан зардап шекті. Ақтөбеде суағары жоқ көше көп. Солардың бірі Ясный елді мекенінде орналасқан Құмсуат көшесі. №293 участок. Толассыз жауған жауын бұл көшені телегей теңіз қылды. Тұрғындардың айтуынша, көше тосын жағдайға тосқауыл бола алмайтын күйде. ауа райы бұзылса зәресі қашады. Жағдай жылда қайталанады. Дүйім жұрт әкімшіліктің табалдырығын тоздырып, нәтиже шықпағасын сотқа арызданған. Қалалық та, облыстық сот та тұрғындарды қолдапты. Бюджеттен қаражат бөлінді. Әйтсе де, нәтиже жоқ,-деп налиды жұрт. Жауаптылар бұл көшеге тротуар мен суағарлар салынатынын алға тартады. Айтуларынша, құрылыс жұмыстары басталып та кетіпті. "АсанаДорСтрой" серіктестігі күні-түні бұл учаскеде жұмыстанып жатқан көрінеді. Жоспарға сай биыл Ясный ауылында 15 көше жөндеуден өтуі тиіс. Жаяу жүргіншілер жолағы салынады, асфальт төселеді, жарықтандырылады, суағарлар орнату да жоспарда бар. Жауапты тұлғалардың айтуынша бұл іс қараша айында бітуі тиіс.
Количество показов: 252
Дата создания: 02.07.2024 02:53:18