Шаһардың жол қозғалысына бүгіннен бастап өзгерістер енгізілді. Көлік нөпірі үлкен қиылыстарда жаңадан жол белгілері орнатылып жатыр. Яғни, Әлия Молдағұлова- Әбілқайыр хан даңғылдары қиылысында бұдан былай бір жолақпен ғана солға бұрылуға болады. 4 жолақты жолда екеуі тіке бағытқа, біреуі солға, біреуі оң бұрылуға арналған. Ал ертеңнен бастап Әлия Молдағұлова даңғылымен жүрген жүк көліктеріне айыппұл салынады. Көлік нөпірі үлкен бұл даңғылдарда күніне сан мыңдаған темір тұлпар жүріп өтеді. Қос даңғылдың қиылысында бүгіннен бастап тіке жүруге екі жолақ, оңға және сол бұрылыстарға бір жолақтан қалдырылған.
Әлия Молдағұлова даңғылы мен Ағайынды Жұбановтар көшесі қиылысында "Ұшқыштар" аялдамасы жағынан жүйткіп келе жатқан көліктерге сол жаққа бұрылуға болмайды. Тыйым салатын жол белгісі орнатылған. Мұндай белгі "Табыс" коммуналдық базары маңына да қойылған. "Трансэнерго" АҚ мекемесінің жағынан қозғалған көлікке қиылыста сол жақ бағытқа бұрылуға болмайды. Сондай-ақ, Бәйішев көшесі мен Молдағұлова даңғылының түйіскен бөлігінде сол жақ бағытқа рұқсат жоқ. Аталған даңғылда бұдан былай жүк көліктерінің өтуіне тыйым салынады. Жол белгілеріне бағынбай өткен жүргізушілерге 5 АЕК көлемінде айыппұл парағы толтырылады.