Шаһарда аялдамаларды жалға алу бойынша кезекті байқау өткізіледі. Үшінші мәрте ұйымдастырылатын байқауға 35 аялдама шығарылған. Аукцион түрінде өткізілетін байқау желтоқсан айында жарияланады. Аялдамаларды жалға беру мерзімі әдеттегідей 20 жылға белгіленген. Байқауға аялдама жанынан кәсібін дөңгелетемін деген кез-келген кәсіпкер қатыса алады. Конкурстың шарты қиын емес. Дайын бизнес жоспар ұсынып, байқауға қатысуға өтініш жазылуы қажет. Құжат тапсырылған соң жеке кәсіпкер немесе ірі серіктестік өкілі өзінің бизнесіне ыңғайлы орынды таңдайтын болады.
Биылдыққа үшінші мәрте жарияланып отырған байқау желтоқсан айында өтеді. Жылдың соңғы айында белгіленген аялдаманы ұтып алған кәсіпкер келер жылдың сәуір айына дейін құрылысын жүргізуі тиіс. Үлгермеген жағдайда тағы бір рет мерзімін ұзартуына рұқсат етіледі. Аялдамалар қаланың барлық бөлігінен ұсынылып отыр. Тіпті үнемі ұмыт қалатын Шанхай, Сүт зауыты , Құрмыш аудандарынан бірнеше аялдамалар шығарылған. Ең үлкен аялдама көлемі 70 шаршы метр. Бұл жерде кәсіпкерге ең бастысы аялдама заманауи, әрі жылы болып салынуы міндет етіледі. Ал ұялы телефон қуаттағыш құрылғы мен жарнама бағандарын орнатуды кәсіпкердің өзі шешетін болады.