Сенбі, жексенбідегі локдаун алынады. Демалыста қоғамдық көліктер қызметі жанданып, шағын және орта бизнес нысандары жұмыс жасайды. Бүгін үкімет басшысы Асқар Маминнің тапсырмасымен елде эпидемиологиялық жағдайдың тұрақтануына байланысты ведомствоаралық комиссия карантинді жеңілдету бойынша бірқатар шешім қабылдады. "Ашық" жобасына қатысушы мекемелердің жұмыс уақыты ұзартылды. «Табыс» коммуналдық базарының "Ашық" жобасына қосылғанына 1 айдан асты. Мұнда күніне 500-ден астам адам келеді. Карантиндік шектеу қойылғалы базар демалыс күндері жұмыс жасамайды. Есесіне жұма күні адам қарасы көбейеді. Сондықтан бұл күнде әлеуметтік қашықтық сақталады деу қиын. Ал көкөніс сатушы Жанаргүл Келешованың жұмысқа шықпайтын 2 күнінде шығыны шаш етектен. Ол егер демалыс күні сауда орны ашық болса, бұл саудагерлерге де, тұрғындарға да қолайлы болар еді, дейді.
28 тамыздан бастап "Ashyq" жобасына қатысатын барлық бизнес нысанына демалыс күндері сағат түнгі 12-ге дейін, "Ashyq" көшбасшыларына сағат түнгі екіге дейін жұмыс істеуге рұқсат етіледі. Оларға қойылатын шарт - қызметкерлер мен келушілердің "Ashyq" қосымшасы арқылы расталған "жасыл" мәртебесі болуы тиіс. Сенбі күні қоғамдық көлік жүреді. Ал 30 тамыздан бастап жұмыс күндері "Ashyq" жобасына қатысатын барлық бизнес объектісінің жұмыс уақыты кешкі оннан он екіге дейін, жоба лидерлері үшін жұмыс уақыты түнгі 12-ден екіге дейін ұзартылды.
"Табыс" базарында сауда орындарын жалға алып, жұмыс жасап жатқан 400 саудагер бар. Олардың 90 пайызы екпемен қамтылған. Карантин талаптарын орындамағандар 80 мың теңгеден астам айыппұл төлейді. Ал қосымшаны дұрыс пайдаланбаған бизнес нысандарының жұмысы екі айға тоқтатылады. Өңірде эпиджағдай әлі де тұрақсыз. Сондықтан әліптің артын бағуға тура келеді.