Облыста автокөлік жолдары ақылы болуы мүмкін. Бүгін Астана ауданы әкімдігінде ақылы жол жүйесін енгізу туралы қоғамдық тыңдау өтті. Мамандардың айтуынша, бұл бюджеттен қосымша қаражатты қажет етпейді. Ақылы учаскелер өзін-өзі қаржыландырады. Облыстағы күре жолдардың бәрі - Қазақстанның транзиттік тамыры. Ақтөбе-Орал, Ақтөбе-Орынбор республикалық маңызы бар ІІ- санатты жолдар. Ал ақылы болған жағдайда бұл жолдарда тек жүк көліктері ғана төлем жасайды.Мамандардың айтуынша, аталған жолдармен тәулігіне мыңдаған көлік жүйткіп өтеді. Бұл - мемлекет қаржысына салынған жолдың тез тозуына әкеледі. Ал түскен қаражат сол жолды жаңартуға, сапасын сақтауға жұмсалмақ. Сондай-ақ, жолды қысы-жазы күтіп ұстау үшін қосымша қызмет түрлері ашылады. "Нұрлы жол 2020-2025" мемлекеттік бағдарламасы негізінде ҚР Индустрия және инфрақұрылымдық даму министрлігі мен "QazAvtoJol" Ұлттық компаниясы" акционерлік қоғамы төлем алудың "ашық жүйесін" енгізу туралы шешім қабылдады.
Жүйенің ерекшелігі - учаскелерде шлагбаумдар болмайды. Сондай-ақ, жол бойындағы аркаларда орналасқан арнайы камералар арқылы автокөліктер туралы ақпарат тіркеледі. Атап айтар болсақ, бағдарламалық-аппараттық кешен құрылғының көмегімен автокөлік иесінің төлем жасағаны, көліктің жылдамдығы анықталады. Сондай-ақ, көлік салмағын анықтайды. Облыстың бірқатар аудандарында ақылы жолға байланысты қоғамдық тыңдау өтті.Алдағы уақытта ақылы болуы мүмкін Ақтөбе-Орал тас жолы 190 шақырымға жуық. Ақтөбе-Орынбор жолы 92 шақырым. Сондай-ақ, Қарабұтақ, Ырғыз жолдары Қызылордаға дейін ақылы болуы мүмкін. Әзірге нақты баға белгіленген жоқ. Әр учаске бойынша қандай автокөліктерден төлемақы алынатыны тас жолдың техникалық санатына тікелей байланысты.Астанадан келген "QazAvtoJol" ҰК" АҚ өкілі Берік Хасенов Ақтөбенің жолдарына "Өте жақсы" деген баға берді. Оның пікірінше, тақтайдай тегіс тас жолдарды ақылы қылу арқылы сапасын сақтауға болады. Айта кетейік, егер ақылы жолмен жүргені үшін қарыз пайда болып, ол ұзақ уақыт төленбесе, көлік иелеріне ескертпе хаттар жолданады. Бұл ескертулер еленбесе, айыппұл салынады. Сондай-ақ, ақылы жолға төлемді уақытылы жасаған дұрыс. Ал жолмен жүріп өткеннен кейін жасалған төлемде айырмашылықтар болады.