"Парижская коммуна-ХХІ" ЖШС-нің аштық жариялаған жұмысшылары наразылық акциясын бүгін тоқтатты. Алты күн бойы нәр татпаған адамдар денсаулықтары сыр беріп, жиі жедел жәрдем көмегіне жүгіне бастаған. Аштық жариялаған жұмысшылардың жағдайына алаңдаған Алға ауданы әкімдігінің өкілдері Бестамақ ауылдық мәдениет үйінде ауыл тұрғындарымен кеңесті. Шағын ауылдың мәдениет үйіне жиналғандар жұмысшылар құзырлы органдардың ұсыныстарын қабылдап, бір тоқтамға келулері керек деген пікірде. Аядай ғана ауылдың тұрғындары айға жуық күндіз күлкіден, түнде ұйқыдан айрылған. Бестамақ ауылының тұрғындарының тынышын қашырған мәселе- "Парижская коммуна-ХХІ" ЖШС-нің төңірегіндегі дау. Бұл баспасөз турына келген тұрғындардың талабы бір. Іргедегі ферма жойылсын. Жұртшылық серіктестік жұмысшылары тарапынан тыйылмай отырған қарсылық әрекеттері ескеріліп, ауыл жанындағы шошқа фермасы көшірілмей қала ма деп қорқып отыр. Ауыл тұрғындарының күдіктенуіне негіз бар. Серіктестік жұмысшылары алты күннен бері аштық жариялаған. 34 жұмысшы нәр татпастан, мәселелерінің оң шешіліп, ферма жұмысының жандануын биліктен талап етуде. Серіктестік жұмысшылары мәселемізге құзырлы органдар үн қатпады деп кінә артып отыр. Дегенмен баспасөз турын өткізуге мұрындық болған Алға ауданы әкімінің орынбасары Мейірхан Ермағанбетов апта бойы жүргізілген жұмыстар нәтижесінде "Парижская коммуна-ХХІ" ЖШС-нің бұрынғы алты қызметкерін жұмысқа орналастыруға мүмкіндік болғанын айтады. Әкімдік қызметкерлері шоқша фермасында аштық жариялап отырған жұмысшылардың жағдайын білу үшін алдарына бірнеше рет барған. Үш жұмысшыға құқықтық көмек көрсетілген.
Шошқа фермасының жабылуына байланысты босап қалған жұмысшыларға жұмыс тауып беру әлі де жалғасатын болады. Тізімдегі 400 жұмысшының 40%-ы Алға ауданының тұрғындары. Қалған жұмысшылар қала мен жақын маңдағы ауылдардан, Әйтеке би ауданынан келіп еңбек етіп жүрген адамдар. Басым бөлігі ер адамдар болғандықтан, оларға жол құрылысы саласында қызметтер ұсынылған. Бас тартқандары жұмыспен қамту бөліміндегі жұмыссыздар тізіміне алынған.