Санаулы күндерден кейін мектеп оқушылары жазғы демалысқа шығады. Бұл кезде балаларды жазғы лагерьге қабылдау науқаны басталатын. Ал биыл облыстың бас мемлекеттік санитар дәрігерінің рұқсатымен тек қала сыртындағы демалыс нысандары жұмыс жасайды. Сондықтан демалыспен қамтылатын оқушылардың саны да шектеледі.
Айта кету керек, ата-ана қамқорлығынсыз қалған балалар, мүмкіндігі шектеулі және аз қамтылған отбасындағы балалар тегін демалады. Бұл санаттарға жатпайтын оқушылар жеке демалыс нысандарында ақылы түрде тыныға алады. Қала сыртында 11 жазғы демалыс лагері бар. Оның 3-еуі мемлекеттік. Қазір жұмыс жасауға рұқсат алған 7 лагерь балаларды қабылдауға дайындық жұмыстарын бастады.