Коронавирус індетін жұқтырған науқастар саны күн сайын көбеюде. Тек қаңтар айында 200-ге жуық адам КВИ жұқтырған. Облыс тұрғындары арасында жыл басталғалы коронавирустан көз жұмғандар бар. Бұл туралы бүгін өңірлік коммуникациялар қызметінде өткен брифингте айтылды.
Облыстағы эпиджағдай күрделеніп, коронавирус күн сайын күш алып бара жатыр. Соңғы тәулікте жиырмаға жуық адам КВИ жұқтырған.
Ал соңғы 5 тәулікте коронавирус індетін жұқтыру бойынша 70 жағдай тіркелген. Қыркүйек айынан бері облыста 650 адамнан КВИ анықталды. Оның 81-і 18 жасқа дейінгі балалар. Ал оқушылар арасында 33 жағдай тіркелді. Коронавирус жұқтырған оқушылардың басым бөлігі қашықтан оқитындар. Бүгінде үй карантиніндегі 421 адам медициналық бақылауда. Сондай-ақ, қаңтар айында облыстың 4 тұрғыны коронавирус инфекциясынан көз жұмды.Сондай-ақ, облыста жедел респираторлы вирустық инфекциямен ауырғандар қатары көбейген. Белгілі болғандай, 7 күнде 500-ден аса жағдай тіркелген. Олардың көбі - балалар.
Айта кетейік, облыс бойынша былтыр қазан айында-72, қарашада-167, желтоқсанда-202 адамнан КВИ анықталса, биыл қаңтардың 21-іне дейін 178 адам коронавирус жұқтырды. Сондай-ақ, пневмония бойынша қаңтар айында 85 жағдай тіркелді. Ал тамыз айынан бері 1000-нан аса адамнан пневмония анықталды. Біздің өңір коронавирус инфекциясының таралуы бойынша "жасыл" аймақта.