"Ақтөбе" футбол клубы бесінші мамырдан бастап қарсылас командалармен кездесулерін Орталық стадионда өткізетін болады. Қазір стадион басшылығы жаңа маусымға дайындықтарын пысықтап жатыр. Биылғы дода басталғалы өз алаңындағы екі ойынды жергілікті футбол клубы Орталық стадионда емес, Есет батыр көшесіндегі №8 балалар мен жасөспірімдер спорт мектебінің жасанды жасыл алаңында өткізді. Ертең "Атырауды" да сол жерде қабылдайды. Тек келесі матчтан бастап Орталық стадион жанкүйерлерге есігін айқара ашады. Бесінші мамыр күнгі Қостанайдың "Тобылымен" кездесуіне қазір қызу дайындық жүріп жатыр. Бірінші кезекте, табиғи көгалдың жағдайына мән беріліп отыр. Жасыл алаңды күтіп-баптау- оңай шаруа емес, дейді Орталық стадион директоры Қажымұқан Демеуов. Көгалға дер кезінде жылу беріп, суғарып отыру қажет. Барлық жұмыстар автоматтандырылған. Қыс бойы жамылғының астында жатқан көгалда бір аптадан соң ғана доп қуалауға болады. Тәртібімен талай сынға ұшырап жүрсе де, өздерін нағыз фандар санайтын "13-ші секторға" биыл да 18-ші сектордан орын бұйырып отыр. Бұл бір жағынан жанкүйерлерлер оғаш қылық көрсетіп, тәртіп бұзып жатса, бақылауда ұстауға оңтайлы болу үшін жасалып отыр,дейді Қажымұқан Демеуов. "Ақтөбе" -Қазақстан футболының брендіне айналған клуб деген тіркес соңғы кезде аз айтылып жүрген жоқ. Футболды тамашалауға келгендер де соған лайық болса екен тілек бар. Матчты көруге келіп, стадионды қоқыс алаңына айналдырып кететіндер азаймай отыр. Биыл қауіпсіздікті күшейту мақсатында орталық стадион басшылығы өз қаражаттарына 10 металліздегіш құрылғы сатып алған. Биылғы маусымдағы тағы бір жаңалық- Орталық стадионға қуаттылығы 10 мегабиттық желі тартылған. Арнайы қондырғы алаңдағы ойынды интернет арқылы бейнетранслация жасауға мүмкіндік береді. Ойынды тамашалағысы келгендерге енді екі дүңгіршектің алдында кезекке тұрудың қажеті жоқ. Биылғы маусымнан бастап арнайы билет сататын орын ашылды. Қобыланды батыр атындағы орталық стадион- Премьер-Лига ойындары кезінде жанкүйерлер ең көп жиналатын алаң. Қазақстан футбол федерациясы өткен жылы ел чемпионаты кезінде жанкүйерлердің орташа көрсеткішін жариялау барысында, осындай қорытындыға келген.