Жөндеу жұмыстары басталып та кетті. Екі аптадан бері Қонаев көшесінің Жүргенов және Жанқожа батыр көшелерімен қиылысатын тұсы уақытша жабық. Аталған аумақта "Ақбұлақ" АҚ кәріз құбырларын тазарту жұмыстарын жүргізіп жатыр. Тозығы жеткен құбырлар жаңасына ауыстырылады.

Қонаев көшесіндегі жұмыс қарқын алған. Екі аптадан бері аталған аумақ қоршалып, көлік қозғалысына уақытша тиым салынған. Арнайы техника кәріз құбырларын тазартып жатыр. Жұмысты жүргізіп жатқан - алматылық мердігер компания. "Ақбұлақ" АҚ басшылығы таңдаудың "АйДжи ЖШС-не түсуіне жұмысты сапалы жүргізетіндігі себеп болды дейді. Аталған компания былтыр Әбілқайыр хан даңғылында осындай жұмыстар тындырған болатын. Кәріз құбырларын тазартып, коллекторды ауыстыру- "Ақбұлақ" АҚ-ның инвестициялық жобасына сай жүргізіліп жатыр. Осы мақсатқа акционерлік қоғамның жеке қазынасынан 96 млн теңге бөлінген. Жоспарға сәйкес 945 метр қашықтыққа созылып жатқан құбыр ауыстырылуы тиіс. "Ақбұлақ" АҚ күрделі құрылыс бөлімінің бастығы Асқар Қапиннің айтуынша, аталған аумақтағы кәріз құбырларының әбден тозығы жеткен.