Ақтөбеліктер тағы да үйге қамалуы мүмкін бе? Облыстың бас мемлекеттік санитар дәрігері Нұрсұлу Беркімбаевның сөзінше, қалада коронавирус індеті өршіп тұр. Бір тәуліктің ішінде қауіпті инфекция 226 адамнан табылды. Осылайша аурушаңдық өсімі 2,8 пайызды құрады. Сондықтан індеттен сақтану шаралары қайтадан күшейеді.
Ковид күшейіп барады. Облыста өткен тәулікте індет жұқтырғандардың рекордтық саны тіркелді. Қауіпті вирус ПТР тест арқылы 226 адамның ағзасынан анықталды. Осылайша пандемия басталғалы облыста ауырғандардың саны 8279 адамға жетті. Короновирус пен пневмониядан 79 ақтөбелік қайтыс болған. Ал көптің көкейінде жүрген локдаун мәселесіне келсек, облыстың бас мемлекеттік санитар дәрігері Нұрсұлу Беркімбаева барлығы уақыттың еншісінде екендігін атап өтті. Сондай-ақ ол Рамазан айында топталып ауызашарға баруға немесе үйіне сырттан адам шақыруға болмайтынын ескертті. Биыл облыста "Спутник V" вакцинасын 37 278 адам қабылдады. Оның 6 мыңнан астамы екі компонентін де алған. Ал отандық вакцинаның 1-ші партиясы 26 сәуірден кейін жеткізілетін болады.