Облыста эпидемиологиялық жағдай тұрақты қалпын сақтаса, келесі тоқсанда балалар сабақты мектепке барып оқиды. Облыстық тауарлар мен көрсетілетін қызметтердің сапасы мен қауіпсіздігін бақылау департаменті басшысының орынбасары Мұхтар Сербаев бүгін осындай мәлімдеме жасады.
Коронавирустық инфекцияның күнделікті өсу көрсеткіші өңірде 0,1-0,3 пайыз аралығында. Бұл эпидемиологиялық ахуалдың тұрақты екенін көрсетеді. Егер бір- екі күнде жағдай осы қалыпта тұрса, облыстың бас мемлекеттік санитар дәрігері шектеу шараларын бәсеңдету жөнінде жаңа қаулы шығарады. Ол қаулы бойынша бала саны 300- ден аспайтын мектептер екінші тоқсанда дәстүрлі оқуға көшуі әбден мүмкін. Мектептер қалыпты оқу жүйесіне көшкен жағдайда да ол жерлерде эпидемиологиялық талаптар қатаң сақталады. Шекара бекеттерінде тәртіп күшейтілген. Соңғы үш- төрт күнде облыс аумағы арқылы өзге елдерге өткен жолаушылардың арасынан 18 адамнан коронавирус инфекциясы табылған. Соңғы дерек бойынша облыста коронавирустық инфекцияны жұқтырудың жаңа 7 жағдайы тіркелді. Олардың екеуі Беларуссия мен Қазаннан жүк таситын жолаушылар болып шықты.