3 автокөлік, 120-дан астам ноутбук. Облыс әкімі Архимед Мұхамбетов мектеп бітіруші үздік түлектерге биыл осындай сый жасады. "Алтын белгі иегерлері" мен жас түлектер ұлықталған салтанатқа "Жас дәурен" облыстық фестивалі де үн қосты. "Алтын белгі" алғандардың сегізі облыстық физика-математика мектеп-интернатының түлегі. Осы мектепті биыл 45 жас бітіріп жатса, соның 9-ы түрлі халықаралық деңгейдегі олимпиадаларда жүлделі орын алып, ҰБТ-ден босатылған. Ал ҰБТ-ге қатысқан 36 түлектің 31-і 100-ден жоғары балл жинаған. Облыс әкімі Архимед Мұхамбетов ҰБТ-ден 124 балл алған Аманбек Бекбауов, №24-ші мектеп түлектері Аслан Сайлауов және Ұлжан Нұрлыбектерге "Лада-2108" маркалы автокөліктердің кілтін табыс етті. Ал "Алтын белгі" иегерлеріне ноутбуктер таратылды. Облыс әкімі Архимед Мұхамбетов ескеріп өткендей, биыл облыста 72 түлек ҰБТ-ден босатылған. Олар халықаралық олимпиадалардың жеңімпаздары. Соңғы 3 жылда өңірімізде 34 білім ордасы іске қосылған. Соңғы оқу жылында Назарбаев зияткерлік мектебін қосқанда 10 жаңа мектеп тұрғызылды. 20 мектептің құрылысы жүріп жатыр. "Жас түлек-2013" салтанатына қала мектептерін бітірген 3300 түлек ата-аналарымен бірге қатысуға мүмкіндік алды. 1-ші сыныпқа келіп жатқан шәкірттер аға-апаларына сәт-сапар тіледі.