Қоғамға қызмет жаса! Тәуелсіздіктің 30 жылдығына орай еріктілер осындай атаумен акция бастап кетті. Оның шеңберінде аз қамтылған, мұқтаж жандарға әлеуметтік қолдау көрсетіліп, жалғызбасты қарттарға үй шаруашылығына көмек беріледі. Қалалық жастар ресурстық орталығының ұйымдастыруымен бүгін бір топ жас Шанхай ауданында жалғызбасты кейуананың ауласының қарын аршып берді.
Еңбек ардагері София Неалова 78 жаста. Көп жылдар бойы құрылыс инженері қызметін атқарған. Зейнеткердің айтуынша қазір қар тазалау тұрмақ үй тірлігін істеуге де денсаулығы жарамайды. ІІ-топ мүгедегі. Қарияға үй шаруашылығында қала жастары көмектесіп тұрады.
Акцияның мақсаты да сол - қоғамға пайда тигізу. Бүгін күні бойы қайратты жастар 5 үйдің ауласын қардан тазартып берген. Ал қайырымдылық акциясы жыл бойы жалғасады.Белсенді жастар осылайша ақсақалдар және мүмкіндігі шектеулі жандарға қызмет қылып, олардың алғысына бөленіп жүр.