Облыста белең алған пневмония мен коронавирус індетіне қарсы күресте дәрігерлерге М. Оспанов атындағы Батыс Қазақстан медицина университеті мен медициналық колледж студенттері жәрдемдесетін болады. Бұл жөнінде бүгін өңірлік коммуникациялар қызметінде брифинг өткізген аймақ басшысы Оңдасын Оразалин мәлім етті. Облыс әкімі қауіпті індеттен барынша өз-өздерін қорғауы қажет тұрғындардың әлі де салғырттық танытып отырғанына қынжылыс білдірді. "Өңір басшысы ретінде маған әрбір тұрғынның өмірі қымбат" деген Оңдасын Оразалин күн сайын науқастардың көбейіп жатқанын айтты. Босаңсып кеткен адамдар санитарлық талаптарды сақтамай отыр. Дегенмен, қайтыс болғандар арасында жүрек-қан тамырлары аурулары, қант диабеті, жүйке ауруларына шалдыққандар бар.
Осыған сәйкес бірқатар шаралар қолдануға тура келген. Кеше демалыс күндері дезинфекция жүргізілді. Сонымен қатар, 1926 керуеттік карантиндік стационар дайындалып, қазір 1355 адам емделуде. Алдағы күндері облыс әкімінің тапсырмасымен тағы 200 орындық стационар ашылмақ. Барлық емханалардың жанында күндізгі стационарлар жұмыс істеп, күніге 100-200 адамды қабылдауда. Осыған дейін 200-ге жуық мониторингтік орталықтар құрылып, 4600 нысан тексерілген. 1200 ескерту жасалған. Өңір басшысы науқастарға тек дәрігерлер тағайындаған дәрі-дәрмектерді қолдануға кеңес берді. Алдағы уақытта дәрі-дәрмектерді, медициналық жабдықтарды жеткізу үшін Ресей Федерациясымен бірігіп жұмыс жасалады.