Облыста Назарбаев зияткерлік мектебіне баласын оқытқысы келетін ата-аналардан арыз қабылдана бастады. Өтініштер қарашаның 3-не дейін қаралады. 11-қарашада балалар алғашқы тестілеу сынағынан өтеді. 14-қарашада жазбаша емтихан тапсырады. Мектепке 7-8-9-сынып оқушылары ғана қабылданады. Қабылдау Сәтпаев көшесіндегі оқу-әдістемелік орталығында жүріп жатыр. Келушілер көп. Бірақ, көбі әлі де әліптің артын бағып отырғанға ұқсайды. Сондықтан екі ойлы болып жүрген ата-аналарға бәрі мұқият түсіндіріліп, мамандар кеңес беруде. Әйтсе де ата-аналардың асыққаны жөн дейді мектеп басшылығы. Өйткені облыс бойынша Назарбаев зияткерлік мектебінде білім алудан үмітті оқушылар өте көп. Соңғы емтихан 14-қараша күні жазбаша түрде өтеді. Физика және математика пәндерінен. Физика, математика пәнін тереңдетіп оқытатын зияткерлік мектебі 720 орынға есептелген. Баласының алғырлығына сенген кез-келген ата-ана осы орындардың бірінен үміттене алады. Мектепте білім алу тегін. Байқаудан өткен оқушы тұңғыш президент Нұрсұлтан Назарбаевтың "Өркен" білім грантына ие болады.