Металлургтер кәсіби мерекелерін тойлады
 |
Қазақстан металлургия саласының мамандары шілденің үшінші жексенбісінде кәсіби мерекені тойлады. Төл мейрамнан Ақтөбе ферроқорытпа зауытының жұмысшылары шет қалған жоқ. 70 жылдық тарихы бар алпауыт өндіріс орнының дамуына еңбегін сіңірген үздік металлургтер автокөлік мініп, төсбелгімен, алғыс хатпен құрметтелді. 1941 жылы құрылысы басталып, 1943 жылы металдың бірінші тоннасы балқытылған Ақтөбе ферроқорытпа зауыты 70 жыл бойы тоқтаусыз жұмыс істеп тұр. Зауыттың үш балқыту цехы, шлактарды қайта өңдеу, шихта даярлау, кен-байыту цехтары мен басқа да қосымша нысандарында қашанда қайнаған тіршілік. 70 жылдың ішінде 11 басшы ауысқан өндіріс орнында қазір 3 мыңнан астам адам еңбек етеді. Балқытушылар, фрезерлеушілер, кран жүргізушілері мен инженерлердің ерен еңбегінің арқасында балқыту цехтарындағы от бір сәтке де сөнген жоқ.
Металл балқыту ісіне бүкіл ғұмырын арнаған, ауыр да жауапты кәсіптің иелері - металлургтерді өткен сенбіде аймақ басшысы Архимед Мұхамбетов құттықтады. Ол зауыттың екі жұмысшысына алғыс хат, тағы екеуіне "Нұр Отан" партиясының мақтау қағаздарын табыс етті. "Қазхром" трансұлттық компаниясы" АҚ президенті Виктор Тиль "Еңбектегі ерлігі үшін" құрмет белгісі және 200 мың теңге сыйақымен төрт адамды марапаттады. ENRC корпорациясының алғыс хаты және 30 мың теңге сыйақы үздік бес жұмысшыға бұйырды. №2 балқыту цехы бастығының орынбасары Серік Әбеновтің кеудесіне "Үздік өнертапқыш" төсбелгісі тағылды. Оған 100 мың теңге сыйақы берілді. "Қазхромның" құрметті жұмысшысы" алтын және күміс төсбелгілері сегіз адамның кеудесінен орын тапты. Қоғамдық тамақтандыруды ұйымдастыру жөніндегі бөлімнің басшысы Әділбек Тоқтасынов 2 дәрежелі "Еңбек даңқы" төсбелгісімен марапатталды. Жалпы саны - 130 қызметкер алғыс хаттар мен ақшалай сыйлықтарға ие болды. Ал, үздіктердің ішіндегі үздіктерге су жаңа "Шкода" көліктерінің кілттері табысталды. Темір тұлпар бұйырған бес металлургтің бірі зауыттың қойма шаруашылығына жауапты адам - Серік Момынов. Салтанатты жиын бұнымен біткен жоқ. Зауыт жұмысшылары әрі қарай "Металлургтер мәдениет үйінде" тойлатты.
|
Количество показов: 2757
Дата создания: 22.07.2013 18:44:56
