Мемлекеттік сот орындаушылары Бестамақтағы шошқа фермасының жұмысын тоқтатты. Анықталған заңбұзушылықтар бойынша нақты қолданылған шара осы болды. Кәріз құдығы бұғатталған соң қожалықтағы шошқалар қырыла бастады. Ферма қожайыны тағы бір экологиялық мәселе туындады, деп дабыл қағуда. Бестамақтағы атышулы шошқа фермасы ақыры жабылып тынды. Сот орындаушылары қожалықтың кәріз құбырын жауып тастаған. Сот орындаушыларының дәл қазіргі әрекеті экологиялық апатқа апаруы мүмкін, дейді "Парижская коммуна XXI" ЖШС құрылтайшысы. Кәсіпкер Гайк Тертерянның сөзінше, кәріз желісі жабылса, ауа жетпей шошқалар бір аптада қырылады. 42 мың бас өлексені жою да оңайға түспейді, дейді. Аммиактың жоғарғы мөлшері адам ағзасына өте зиян. Қоршаған ортаға да, адамға да қыруар залал келейін деп тұр. Қожалық басшылығы кәріз көзі жабылғалы 100- ге тарта шошқа тұншығып өлгенін айтады.
Бестамақтағы шошқа фермасының жұмысшылары қожалықтағы бірқатар олқылықтардың орны толтырылып, тазалық мәселесіне көңіл бөліне бастағанын жеткізді. Тіпті олар жануарлардың қалдықтары мен көңнен тозаңдандырғыш зат жасап, ауылшаруашылығымен айналысушыларға арзан бағамен бермекші. Ол үшін арнайы цехтың жұмысын жандандыру қолға алыныпты. Дегенмен, Бестамақтағы шошқа фермасы қожайынының тексеруші органдардың ескертулерінен еш нәтиже шығармағандығы белгілі болды. Оларға өткен жылы ескерту жасалған екен. Естеріңізге сала кетсек , қожалық бірнеше жыл бойы шошқа сойып, оның қалдықтарын жерге көміп , шайынды суын жақын маңдағы өзенге ағызып келген. Қаңтар айынан бері үйқамақта отырған қожалық иесі Гайк Тертерян экологтар салған 7 млрд теңге айыппұлмен келіспейтінін айтады. Ол ферма жабылса, «ҚазАгроҚаржы» АҚ- нан алынған миллиардтаған қаражатты қайтара алмайтынын айтты.