"Мектепке жол" акциясы бүгін қалалық орталық мешітте жалғасты. Қайырымдылық акциясында 50 оқушыға қажетті мектеп жабдықтары мен сөмке сыйланды. Оқушылар төменгі сыныптарда оқиды. Мешіт жамағаты сыйлықтарын табыстап, басталған оқу жылында балақайларға сәттілік тіледі. Гүлбақыт Қалауованың биыл үш баласы мектепке барды. 1-ші, 4-ші, 6-шы сыныптарда оқиды. Онлайн білім алып жатқан балалар әзірге ұялы телефон арқылы сабақтарын оқып жатыр. Компьютер алып беруге ата-анасының жағдайы келмейді. Дегенмен көпбалалы ана балаларын биылғы оқу жылына тамыз айынан бастап дайындаған. Қажетті мектеп құралдарын сатып алыпты. Бүгін балаларына қажет болып жүрген сөмкелерін қайырымды жандар сыйлады.
Қайырымдылық акциясында 50 оқушыға сөмке сыйланды. Қалалық орталық мешіттен үнемі көмек алып тұратын Әлия Елеусінованың екі баласына да сөмке берілді. Үйімде ғаламтор мен компьютер болмағандықтан балалар мектепке барып оқып жүр деген келіншек, олардың денсаулықтарына алаңдайтынын айтты. Жылдағы дәстүр бойынша тамыз, қыркүйек айларында "Мектепке жол" акциясы қарқын алады. Жергілікті кәсіпкерлер тұрмысы төмен отбасылардың балаларына мектеп құралдарын алып беруге ынталы. Бұл үрдіске шаһардағы алты мешіт те атсалысып жатыр. Мектеп сөмкелерінің іші оқушыға қажетті сызғыш, қалам, қарындашпен толтырылған. Төменгі сынып оқушыларына арналған арнайы дәптерлер де салынған. Акция ұйымдастырушылары ай соңына дейін тағы бір қайырымдылық іс өткізуді жоспарлаған.