Балабақшаларға жолдама беру кезеңі толықтай жабылды. Ендігі кезек 2011 жылдың қаңтар айында тіркелген 300 бүлдіршінде. Олардың ата - аналары қалалық білім бөліміне бүгіннен бастап өтініш білдіре алады. Жоспарға сай маусымның үші мен жиырма тоғызы аралығында 2010 жылы кезекке іліккен бүлдіршіндер балабақшағы орындармен толықтай қамтылды. Барлығы 2972 ұл- қызға жолдама берілді. Енді қалалық білім бөлімі бос қалған орындарды толтыру мақсатында өтініш қабылдайды. 2011 жылдың қаңтар айында 805 бала тіркелген, оның 300-і тамыз айында балабақшаға орналастырылады. Бос орындар қала бойынша бірнеше ықшам ауданда орналасқан мектепке дейінгі ұйымдарда бар. Сондай - ақ қосымша білім мекемелері жанынан ашылған шағын орталықтарға да қабылданады үш жасқа толған бүлдіршіндер. Қаланың ескі бөлігінде №42 мектеп жанынан ашылған шағын орталықта, орталық базар аумағындағы "Әсем" мектепке дейінгі ұйымында, №40 "Балдәурен" бақшасында бос орын бар. Ал Шанхай ауданын қалайтын ата - аналар үшін №40 және №16 мектептердің шағын орталығы, №39 "Достық" бақшасы балалар қабылдайды. Мәскеу ауданы бүлдіршіндері үшін де өз үйлері маңынан орын табылады. Сондай - ақ Заречный -1 елді мекенінде, Кірпішті ауылы, қалалық сүт зауыты аудандарындағы бірқатар мектепке дейінгі ұйымдар жеткіншектерді қабылдауға әзір. Жалпы балабақша кезегінде 26500 өрен тіркеуде тұр. Бұл жылдан - жылға толықтырылатын тізім болғандықтан, жыл аяғына дейін мектептер жанынан қосымша шағын орталықтар ашу жоспарда. Бұл Оңтүстік- Батыс ауданында, "Гүлдер" ықшам ауданында тұратын ата - аналардың балалары үшін мүмкіндік.