Мәңгілік алау алдындағы алаңда бүгін Ұлы Жеңістің 68-жылдығына арналған мерекелік митинг өтті. Оған облыс әкімі Архимед Мұхамбетов бастаған жергілікті билік өкілдері, құзырлы орган басшылары, мемлекеттік мекеме, қоғамдық ұйымдардың өкілдері қатысты. Арамызда қалған Ұлы Отан соғысы ардагерлері мен тыл еңбеккерлері ұлықталды. Ал майданнан оралмаған жауынгерлер рухына тағзым етіліп, мәңгілік алауға гүл шоқтары қойылды. 
Ұлы Отан соғысына қатысқан елдерде бұл мәңгілік алау оты ешқашан өшпеген. Маздап жанған қызыл жалын майданнан қайтпаған қайсарларға құрмет. От қаза тапқан жауынгерлерге "о, дүниені" жарықтандырып тұр деп сенейік. Ауру-сырқау меңдеп, төрт қабырғаны қорғаныш санайтын қариялар жылына бір мәрте 9-мамыр күні екі аяққа күштерін жиып, мәңгілік алау қасына жетеді. Бүгін де балалары, немерелерінің демеуімен ардагерлер жеңістің 68-ші жылын көппен бірге атап өту үшін алаңға келді. Құрметті орынға жайғасқан ақ жаулықты аналар мен ақ сақалды аталар 70 жылдан астам бұрынғы соғыс балалары. Майданда от кешкен жауынгерлер. Сезінсе, мерекенің ұлылығын дәл осы адамдар шын сезінеді. Әжім басқан жүздерден сағыныш пен қуанышты бірден аңғарасың. Ұлы Отан соғысына 35 миллион адам қатысқан екен. Соның 1 миллионнан астамы қазақстандықтар. Ақтөбе облысы 122 мың 423 ер азаматты соғысқа аттандырды. 36 мыңнан астам ұл елге қайтып оралған жоқ. Ақтөбеден 35 Кеңес Одағының батыры шықты. 9 адам "Даңқ" орденінің толық кавалері. 15 мың жауынгер соғыс ордендерін алған. Бүгінде қалада 203-ақ Ұлы Отан соғысының ардагері қалды. Мерекелік митинг мәңгілік алауға гүл шоқтарын қою рәсімімен жалғасты. Гүл шоқтары батыр қалалар құрметіне де қойылды. 2015-жылы Ұлы Жеңіске 70 жыл толады. Осыған орай Кеңес одағы құрамында болып, жеңіске бірге қол жеткізген мемлекеттердің президенттері датаны кең көлемде атап өту, мереке жоспарын бірігіп құру жөнінде биыл келісімге қол қойды.