Әлия Молдағұлова әуежайы. Ақтөбе халықаралық әуежайына қазақтың мерген қызы Әлия Молдағұлованың есімі берілді. Әуежайда Ұлы Жеңістің 76 жылдығына орай мерекелік шара ұйымдастырылып, сол жерде қуанышты жаңалық жария етілді. Батырдың құрметіне орай мүсін орнатылып, келгендер ескерткішке гүл шоқтарын қойды. Мерекелік шараға облыс әкімі Оңдасын Оразалин, қала әкімі Асхат Шахаров, әлиятанушы Ғалымжан Байдербес және Кеңес Одағының батыры Әлия Молдағұлованың туған-туыстары қатысты. Әуежайымыз Әлия Молдағұлованың атымен аталғанына қуаныштымын,- дейді зерттеуші.
Әлия Молдағұлованың мемориалдық бюсті әуежайдың сәнін келтіріп тұр. Бюсттің авторы белгілі ақтөбелік мүсінші Жеңіс Жұбанқосов. Мемориалдық бюсттің жалпы биіктігі 247 см. Мүсінші оны 1 ай бойы жасаған. Салтанатты рәсімге қатысқандар саны аз болмады. Арнайылап келген конақтармен қатар сапарға шыққалы тұрған жолаушылар да мүсінді тамашалап, қошеметтерін аямады.