Ақтөбеде ҚР Денсаулық сақтау министрі Алексей Цойдың қатысуымен коронавирус инфекциясына қарсы штаб отырысы өтті. Жиынға денсаулық сақтау вице-министрі Ажар Ғинаят, ҚР Санитарлық- эпидемиологиялық бақылау комитетінің төрайымы Айжан Есмағамбетова, облыс әкімінің бірінші орынбасары Руслан Хамбаров қатысты. Ал алғашқы санитарлық медициналық көмек көрсету ұйымдарының өкілдері, аудан әкімдері бейне байланыс арқылы қосылды. Өңірге алғаш атбасын бұрған Алексей Цойға аймақтағы пандемиялық ахуал баяндалды. Әсіресе денсаулық сақтау министрі медициналық мекемелердің материалдық-техникалық базасының жайын сұрап білді.
Екі күннен бері Ақтөбенің шенеуніктері үлкен қарбалас үстінде. Өңірге үкімет басшысы келді. ҚР Премьер-Министрі Асқар Мамин бастаған делегация кешеден бері кездесулер, басқосулар өткізіп жүр. Жұмыс тобының құрамына ҚР Денсаулық сақтау министрі Алексей Цой қосылған. Министр коронавирус инфекциясының таралуына қарсы штабтың жиынына қатысты. Алексей Цой былтыр санитарлық-эпидемиологиялық қызметті күшейту үшін санитарлық-эпидемиологиялық бақылау комитеті құрылғанын, ҚР Бас мемлекеттік санитарлық дәрігерінің мәртебесі мен өкілеттіктері артқанын еске салды. Оның айтуынша, қалаларда уақытылы медициналық көмек көрсету үшін 16 модульдік аурухана салынған. Жұқпалы аурулар ауруханалары күрделі жөндеуден өтті. Барлық қалаларда 63 амбулаториялық-емханалық ұйым пайдалануға берілді.Облыстағы 24 инфекциялық стационардың 18-і қазір іске қосылған. 795 кереуетте науқастар ем қабылдап жатыр. Штаб отырысында Руслан Хамбаров Ақтөбенің денсаулық сақтау саласының әлеуеті жоғары екенін атап өтті. Аймақта жоғары білікті мамандар жеткілікті. Қалыптасқан жағдайға байланысты биыл да материалдық-техникалық база қосымша жаңартылатын болады.