Ел тілегін алып ұш, адамзаттың бағына. Ақтөбелік өнерпаздар әлем музыканттарымен бірге "Ақ көгершін" әнін шырқады. Әлемге әйгілі композитор Ахмет Жұбановтың туған күніне орай ұйымдастырылған челленджге Татарстан, Қырғызстан, Беларусь, Әзірбайжан, Түркия мемлекеттерінің әншілері мен Ғазиза Жұбанова атындағы облыстық филиармонияның қазақ камералық хор ұжымы үлес қосты. Идея авторы Елубай Кенжалиевтің айтуынша, музыкалық үзінді орындауда шетелдік әріптестері қазақ өнерпаздарынан кем түспеген. Керісінше бейбітшіліктің символы болған әнді қазақ тілінде шырқауға құлшыныс танытыпты. Сондай-ақ, композитордың "Қарлығаш" әнін Молдова, Башқұртстан, Ресей, Хакасия, Өзбекстан, Үндістан, Тайван, Тәжікстан елдерінің музыканттары ұлттық аспаптарының сүймелдеуімен орындады.
Композитор Ахмет Жұбановтың туындылары әлем музыканттары сүйіп орындайтын шығармалар қатарына жатады. "Көктем", "Ария", "Тәжік биі", "Би күйі" шығармалары бірнеше тілге аударылып, орындалып жүр. Тіпті жылда ұйымдастырылатын, Ақтөбенің брендіне айналған "Жұбановтар әуені" халықаралық байқауына қатысушы мемлекеттер саны артқан.
Әлем музыканттары бірінен соң бірі іліп әкеткен челленджге Башқұртстан мемлекетінің халық әртісі Рамиль Гайзуллин мен Ресей халық әртісі Александр Цыганковтар атсалысқан. "Қарлығаш ұя салған үй бақытты" деген қазақ халқының жақсы сөзі бар. Әрқашанда бір-бірімізге көгершіндей тілекші, қарлығаштай қамқор болайық, дейді шара ұйымдастырушылары. Әлем халықтарын бір-бірімен жалғаған челлендж қазақ музыкасын әлемге танытқан әйгілі академиктің ғажап күйлерін орындаумен жалғаспақ.