Ақтөбелік әскерилер қала көшелерін зарарсыздандыру шараларына жұмылдырылды. Ақтөбе гарнизонының 100-ге жуық қызметкері еліміздегі төтенше жағдай режимі аяқталғанша шаһардың барлық аумағын арнайы сұйықтықпен тазалап отырады. Бүгін арнайы қорғаныш киімдерін киген әскерилер "Қазпошта" аялдамасы маңынан бастап 11 ықшам ауданға дейін сұйықтық шашты.
Қорғаныш киімдерін киген әскерилердің әрқайсысы 20 литрлік ыдыс арқалаған. Тапсырма бойынша оның ішіндегі сұйықтық таусылса қайта толтырылып, діттеген межеге дейін су шашылуы тиіс. Әрбір құты толы суға 450 мл болатын "Рубеж" деп аталатын құрғақ зат қосылады. Суға езіліп дайындалған дәрінің өткір иісі жоқ. Сондықтан адам мен жануар денсаулығына, жасыл өскінге ешқандай зияны жоқ. Із де қалдырмайды. Зарарсыздандыру жұмыстары күн сайын таңнан кешкі алтыға дейін жалғасады. "Рубеж" химиялық қоспасының біздің өңірге 30 келісі жеткізілген. Бұл құрғақ затпен Алматы, Нұр-Сұлтан қалаларында тазалық жұмыстары жүргізілуде. Шаһарда кеше басталған зарарсыздандыру жұмыстарының нұсқаулығын облыстық әкімдік арнайы бекіткен. Кеше барлық базарларға дезинфекция жасалған.