Ертең мектептерде "Кезекші сыныпқа" қабылдау басталады. Еліміздің денсаулық сақтау министрлігі оқу орындарына міндетті талаптардың тізімін жариялады. Осыған орай, жаңа оқу жылында мектепте оқыту тәртібі түбегейлі өзгеріске түсіп отыр. Ақтөбелік мектептерде бекітілген ережелер мен талаптар жөнінде қалалық білім бөліміндегілер баяндады.
Қалада барлық мектептер балаларды қашықтан оқытады. Тек Белагор мектебі бала саны аз болғандықтан, штаттық режимде жұмыс істейді. Сонымен қатар, жаңа оқу жылында қала мектептерінде бастауыш үшін мыңға жуық кезекші сыныптар жұмыс істейтін болады. Бір кабинетте оқитын бала саны 15-тен аспайды. Сондықтан, кейбір кластар екі топқа бөлінеді.
Атап өту керек, кезекші сыныпта созылмалы аурулары жоқ балалар ғана білім ала алады. Және, әрбір екінші сабақтан кейін кабинеттерде, әр үзілістен кейін, ауысымдар арасында, дәліздерде, холдарда ылғалды тазарту жұмыстары жүргізілетін болады. Белгіленген негізгі қағидалардың бірі, сабақтар арасындағы қоңырау әр сыныпқа әртүрлі уақытта соғылады. Ал, мектеп асханасы мен буфеттердің қызметі уақытша тоқтатылды. Ескерте кететін бір жайт, кезекші сыныптардағы оқушылардың ата-аналары мектепке балаларын өздері алып келіп, қайта әкетулері керек. Сондай-ақ, әр ата-ана баласын қорғаныс маскаларымен қамтамасыз етуі шарт.