Қ. Жұбанов атындағы Ақтөбе өңірлік университеті өз студенттері арасында ұтыс ойынын жариялады. Ұтыс тек вакцина салдырған білім алушылар арасында өтеді. Жеңімпаз атанған 100 студенттің оқу ақысына жеңілдік жасалады.
Ереже бойынша студент 1 шілде мен 15 тамыз аралығында вакцина салдырған болуы шарт. Кейін оқу орнының әлеуметтік желідегі парақшасына өзі туралы ақпарат пен вакцинациялау паспортын жіберуі қажет. Білім алушылар арасында екпені қолдауды ынталандыру мақсатында ұйымдастырылған ұтыс жеңімпазы 15 тамыздан кейін белгілі болады. Жеңімпаз атанған 100 студент оқу ақысына жеңілдік алады. Айта кетейік, аталған білім ордасы екпе алу жұмыстарын жүйелі түрде жүргізіп келеді. Бүгінде профессор-оқытушылар құрамындағы 497 адамның 445-і екпе алса, 10 мыңнан астам студенттің 4 135-і вирусқа қарсы вакцина салдырды.