Дауларды реттеуші бірден-бір күш медиаторлар болуы қажет. Бүгін шаһардағы банктердің бірінде медиация кабинеті ашылды. Қаржылық институттар мен тұрғындар арасындағы дауларды сотқа жеткізбей реттеу жолдары қарастырылатын болады. Елімізде 2011-ші жылы енгізілген медиация жүйесі түрлі салада жақсы нәтиже беріп келеді. Өңірде құқықтық қатынастар саласындағы дауларды сотқа дейін реттеу алаңдарын өзге де банктерде ашу жоспарланған. Медиация кабинеті қаладағы банк филиалында республика көлемінде алғаш рет ашылып отыр. Бастама көтеріп отырған №3- қалалық соты. Сәйкесінше бұл кабинетте заңгерлік білімі бар кәсіби медиаторлар қызмет атқаратын болады. Қаржыгер мамандығын игерген мамандарға да есік ашық.
Кабинеттің ашылу салтанатына қатысқан мамандар банк және қаржыны сақтандыру турасында туындайтын дауларды соттан тыс реттеудің маңызды екендігін атап өтті. Өйткені өңірде сотқа түскен азаматтық, экономикалық істердің жартысынан көбін осы секілді даулар құрайды. Тіпті соңғы кезде несие өтеуге қатысты түсетін шағымдар көбейіп кеткен. Қарызды өндіріп алу, кепіл заттарын өндіру, қарыз даулау секілді іс өткен жылы тіпті артқан. Бір ғана №3- қалалық сотта былтыр қаржыға қатысты 60-тан аса іс онлайн өткізіліпті. Сондықтан судьялар осындай дауларды сотқа жеткізбей, тараптар үшін бейбіт шешу өте маңызды деп отыр. Медиация кабинеті банкке келіп, қаржылық сауаттылығы жетпеген кез-келген тұрғынға ашық. Кеңестер тегін көрсетіледі.