Биылдан бастап өңірде кәсіпкерлердің қаржысына әлеуметтік нысандар салына бастайды. Әзірге үш орта мектеп тұрғызылып, қыркүйек айында пайдалануға берілмек. Жартылай коммерциялық нысандар қатарына жатақханалар да кірмек. Бүгін облыстық кәсіпкерлер палатасында ақтөбелік кәсіпкерлермен кездескен республикалық "Қаржы орталығы" акционерлік қоғамының сарапшысы Айнұр Сағындықова бұл жоба туралы бүге-шүгесіне дейін түсіндіріп өтті. Әлеуметтік нысандарды салу жобасына қатысқан кәсіпкерлерге мемлекеттен жыл сайын қомақты қаржы бөлініп отырады. Бұл жоба бойынша республикалық бюджетте биылға 56 миллиард теңге қарастырылған. Қаржы бизнесмендер салған мектептерде балалардың тегін оқуына, ал жатақханаларда студенттердің тегін жатуы үшін жаратылады.
Жобаның тағы бір артықшылығы- тұрғызылған әлеуметтік нысандар инвестордың меншігінде қалады. Тұрғызылған ғимараттың 20 жыл бойы статусы өзгермеуі керек. Жобаға қатысқан кәсіпкер білім беру қызметімен айналысуға рұқсат беретін лицензия алады. Мемлекеттік тапсырысты орындай отыра, сегіз жыл бойы әрбір оқушы үшін мемлекеттен 96 АЕК көлемінде қаржы алады. Ал егер кәсіпкер бұрыннан бар ғимаратты мектеп етіп қайта жаңғыртқан болса, 47 АЕК мөлшерінде өтемақы алып отырады.
Әлеуметтік нысандарды салу жобасына өңірден үш кәсіпкер қатысқан. Қалада жеке мектептер салынып біткен. Қыркүйек айында ашылады. Жоба жатақхана тұрғызу жағынан ақсап тұр. Оған шағын қалалар мен аудандық кәсіпкерлерді тарту жағы қарастырылуда.