Биыл облыста су тасқынының алдын алу жұмыстарына 1584 адам мен 467 бірлік техника жұмылдырылған. Қосымша 229 мотопомпа мен 73 жүзу құралы дайын тұр. Өткен үш тәулікте 52 шақырым болатын 102 арық толықтай тазартылған. Бұл туралы бүгін өңірлік коммуникация қызметінде облыстық төтенше жағдайлар департаментінің басқарма бастығы Құмар Тұрмағамбетов мәлімдеді. Қала көшелері мен жер үй аулаларынан 55 мың текше метр су сорылған. Су тасқыны болған жағдайда тұрғындарды уақытша орналастыратын 76 орын дайындалған.
Облыстық төтенше жағдайлардың алдын алу басқармасы бастығының айтуынша, қазір қар жамылғысы көрсеткіші 80 %-ды құрап отыр. Оңтүстік аумақтар санатындағы Шалқар, Ырғыз, Байғанин, Ойыл, Темір аудандарында ақ ұлпа қалың емес. Ал, өңірдегі үш ірі су қоймасындағы судың көлемі 30 %-дан аспайды. Ақтөбе, Сазды, Қарғалы су қоймалары 280 млн текше метрге дейін су қабылдай алады. Тасқынға қарсы 9730 тонна инертті материал дайындалған. Сондай-ақ, 218 млн теңге қосымша бөлінген қаражатқа 230 тонна жанар-жағар май , 34 мың 500 бірлік қап дайындалған. 13 мың адамды қабылдай алатын 76 уақытша орналастыру пункттері жарақтандырылған. Бүгінгі таңда облыс аумағынан 500 мың текше метр қар шығарылған. 620 бөгет пен көпір аумағы тазартылған. Су басу қаупі бар аймақ қатарындағы 30 елді мекенде 11 мыңнан аса тұрғын өмір сүреді. Аса қауіпті аймақ саналатын 13 елді мекенде 1770 адам тұрады.