"Парижская коммуна" ЖШС-і жуық арада жұмысын толық тоқтатуы мүмкін. Себебі сот шешімдерімен шошқа бордақылау кешенінің көң қоймасы мен сарқынды суды ағызатын жүйесі қызметіне тиым салынған. Ал бұл қызметтерге рұқсат берілмесе, ферма әрі қарай жұмыс жасай алмайды, дейді Алға ауданы әкімінің орынбасары Мейірхан Ермағамбетов. Бүгін Қ. Жұбанов атындағы Ақтөбе өңірлік университетінің "Жастар" сарайында аймақтың экологиялық проблемалары көтерілген алқалы жиын өтті. Оған облысымызға арнайы келген ҚР Экология министрі Мағзұм Мырзағалиев қатысты.
Өңірімізге жұмыс сапарымен келген ҚР Экология министрі Мағзұм Мырзағалиев Бестамақ ауылына барып, ақтөбелік табиғат жанашырларымен кездескен. Ауыл тұрғындары шошқа бордақылау кешеніне қатысты мәселенің тез арада шешілгенін қалайтындықтарын жеткізді. Белсенділер былтырдан бері ферма басында түсірілген бейнежазбаларды әлеуметтік желілерге жүктеп, экологиялық проблемаға қоғамның назарын аударуға тырысып жүр. Сең қозғалды. Енді бір нәтижесі болатын секілді. Бүгінде шошқа бордақылау кешенінің көң қоймасы мен сарқынды су азығатын желісінің қызметін тоқтату туралы соттар шешімі шыққан. "Парижская коммуна" ЖШС-інің үстінен әкімшілік, қылмыстық істер қозғалды. Тергеу әлі жалғасып жатыр. 14 миллион теңгеге дейінгі әкімшілік айыппұлдарды кәсіпкер өтеген. Қазір 7 миллиард теңгеге салынған айыппұлмен бизнесмен келіспей, құқығын сотта даулап жатыр. Осы және өзге де мәселелер көтерілген жиын бүгін "Жастар" сарайында өтті. Елдің экология кодексіне енгізілген өзгерістер көпшілікке түсіндірілді. Қоршаған ортаны ластаушыларға жазаны қатаңдату, жауапкершіліктерін арттыру жолдары талқыланды.