Жаңа оқу жылында мектеп оқушыларын оқулықпен қамту үшін облыс бюджетінен 1 млрд 717 млн теңге бөлінді. Республика деңгейіндегі 18 баспаханамен келісімшарт жасалып, оқулықтарды өңірге жеткізу мәселесі толықтай шешілуде. Бұл туралы бүгін өңірлік коммуникациялар қызметінде өткен баспасөз мәслихатында облыс әкімі Оңдасын Оразалин мәлімдеді. Өңір мектептерінде жаңа оқу жылында 158 мың оқушы білім алады. Олардың 90 пайызы қашықтан оқытылады. Тек шалғай елді мекендердегі шағын мектептер дәстүрлі әдіспен оқушыларын қабылдайды. Сондай-ақ облыста жаңа оқу жылында бастауыш сыныптар үшін кезекші кластар ашу жоспарлануда. Болжаммен олардың саны 1800 болады. Облыс әкімі кезекші кластарда әлеуметтік арақашықтық пен санитарлық талаптардың сақталуы басты назарда екенін жеткізді.
Атап өту керек, кезекші кластарға білім беретін мұғалімдердің айлық жалақысына қосымша үстемеақы төленетін болады. Ол жергілікті бюджеттен қарастырылады. Күн тәртібіндегі тағы бір мәселе оқушыларды оқулықпен қамту. Бұл ретте облыс басшысы облыстық бюджеттен 1 млрд 717 млн теңге бөлінгенін жеткізді. Оқулықтарды республикалық баспаханалардан өңірге жеткізу үшін арнайы кесте құрылып, оқу жылы басталғанға дейін оқушылар оқулықтармен толық қамтылатын болады. Облыста мектеп оқушыларының 90 пайызы қашықтан білім алу әдісімен оқытылмақ. Сондықтан, мұқтаж отбасылардың балаларын қажетті компьютерлермен және интернетпен қамту мәселесі де алдыңғы кезекте. Облыс әкімінің айтуынша, қосымша тағы 10 мыңға жуық компьютер сатып алу үшін облыстық бюджеттен де қаржы бөлінеді. Дегенмен, компьютерлерді сатып алу және жеткізу мәселесі тез арада шешілмейтіндіктен, бұл процесс қыркүйек айының соңына дейін созылу мүмкін екенін ескертті аймақ басшысы.