Бүгін мемлекеттік білім гранты иегерлерінің ресми тізімі жарияланды. 30 мың 758 студент төрт жыл бойы мемлекет есебінен оқитын болады. Ақтөбе өңірлік мемлекеттік университетінде грантқа 2 жарым мың талапкер құжат тапсырған. Тегін оқу мүмкіндігі 1 мың 118 адамға бұйырды. Биыл мемлекеттік білім гранттарын барлығы 30 мың 758 адам жеңіп алды. Ақысыз оқу үшін байқауға ел бойынша 68 мың 742 адам түскен. Орта есеппен бір орынға 2,23 адам таласты. Құдайберген Жұбанов атындағы Ақтөбе өңірлік мемлекеттік университетінде грантқа өту үшін 2 мың 535 адам өтініш берген. Оның 1 мың 118-і грант иегері атанды. Грантты бөлу кезінде "Аударма ісі", "Алғашқы әскери даярлық", "Биология", "Халықаралық қатынастар" және "География" мамандықтары бойынша талас көп болған. Мәселен, тілмаштыққа орыс бөлімінде бір орынға 65 талапкер, биолог мамандығына 17 студент байқауға түсіпті. Ел бойынша биыл педагогикалық мамандықтарға 5 мың 32 грант бөлінсе, соның 200-і Ақтөбе университетіне берілген. Грант иегерлерінің аты-жөндері жазылған толық тізімді "Егемен Қазақстан" және "Казахстанская правда" газеттерінің бүгінгі санынан қарауға болады.