Бүгін православ христиандары үшін Радоница күні. Славяндар марқұмдарды еске алып, оларға дұға бағыштайды. Әдетте жоралғы бейіт бастарында жасалатын. Елдегі төтенше жағдайға орай биыл оған тиым салынып отыр. Қазір қалалық зираттарда тек қана жерлеу рәсіміне рұқсат етілген. Бүгін Кірпішті ауылындағы қалалық зират бос тұр. Үлкен қорымда әдетте славяндардың марқұмдарды еске алу күнінде ине шаншар жер болмайтын. Православ христиандары жыл сайын бұл күні зираттарға ғибадат етеді. Туыс, жақындарының бейіттерін ретке келтіріп, айналасын тазалайды. Тізе бүгіп отырып, оларды еске алады. Гүл шоқтарын қояды. Биыл бұл жоралғылар жасалмады. Бірақ, қалалық қорымның тазалығы бақылауда.
Қалалық әкімдік елімізде тарап жатқан індетке байланысты қандай да іс-шараларды, даталарды көптің қатысуымен атап өтуге тыйым салды. Ата-аналар күнінде де ақтөбеліктердің зират басында жиналуына рұқсат жоқ. Қалалық зират әкімшісі Сәбит Дүйсеновтың айтуынша, ол жөнінде тұрғындарға алдын ала хабарланды. "Радоница" Пасхадан тоғыз күннен кейін келетін діни сипаттағы мереке. Мақсаты- әруақтардың рухына тағзым ету. Бүгін шіркеуде арнайы шырағдандар жағылды. Өлілер үшін дұға жасалады. Бұл күні ренжісуге болмайды. Зират басына ас әкеліп тастауға болмайды. Одан да тәтті тоқаштар мен нан өнімдерін мұқтаждарға таратқан абзал.