Бүгін ҚР парламент мәжілісінің тұңғыш төрағасы, саясаткер Марат Оспановтың туған күні. Ол тірі болғанда 64 жасқа толар еді. Атаулы күнге орай, М. Оспанов атындағы медицина университетінде бүгін еске алу шарасы өтіп, мемлекет қайраткерінің мүсініне гүл шоқтары қойылды. Батыс Қазақстан мемлекеттік медицина университетіне Марат Оспановтың есімі қоғам қайраткері қайтыс болған 2000 жылы берілген. Сол жылы оқу орнының бас ғимаратына оның мүсіні қойылды. Бүгінгі еске алу шарасы осы жерде өтті. Гүл қою рәсіміне Марат Оспановтың қарындасы Майра Оспанова, университет қызметкерлері мен студенттер қатысты. Марат Оспанов кім? Батыс Қазақстан мемлекеттік медицина университетіне оқуға түскен әр студентті осы сұрақ ойландырса керек. Марат Оспанов 1949 жылы қыркүйектің 17-сі күні Ақтөбе қаласында туған. 1971 жылы Мәскеудегі В.Г.Плеханов атындағы Халық шаруашылық институтын бітірген соң, еңбек жолын осы медицина универистетінде саяси экономика және КПСС тарихы кафедрасында жас маман болып бастаған. Осы жерде 17 жыл қызмет етіп, кафедра меңгерушісі қызметіне дейін өскен. Кандидаттық, докторлық атақтарын осы оқу орнында жүріп қорғаған. Марат Тұрдығұлұлының әріптестері оны талапшыл, өз ісінің маманы ретінде еске алады. Үлкен саясатқа Марат Оспанов 90-жылдары араласты. Бірнеше мәрте Қазақ ССР Жоғарғы Кеңесінің депутаты болды, қаржы, салық саласы мен құнды қағаздар комиссиясын да басқарды. Қос палаталы кәсіби Парламенттің тұңғыш Мәжіліс төрағасы міндетін атқарды. 13 жыл бұрын 51 жасқа қараған шағында Марат Оспанов дүниеден өтті.