Бүгін қала әкімі Асхат Шахаров халық алдында есеп берді. Былтыр атқарылған жұмыстарды қорытындылады. Жиынға Астана, Алматы аудандарының әкімдері қатысты. Халық әкіммен жүздесуге карантин шектеулеріне қарамастан көбірек жиналыпты. Тіпті кешігіп келіп, орын саны шектеулі болғандықтан сырттан қайтарылғандары да болды. Кездесуде баспана, шағын бизнесті дамыту, азық-түлік бағасы, қоғамдық көлік мәселелері айтылмай қалмады.Шаһар басшысының халықпен есепті кездесуі қалалық мәдениет үйінде өтті. Залда барынша санитарлық талаптар сақталған, орындықтарға тұрғындар арақашықтық сақтап отырғызылған. Алдымен қала әкімі Асхат Шахаровтың есебі тыңдалып, кейін тұрғындарға ауызша және жазбаша сауалдар қоюға рұқсат берілді. Қорытынды кездесуде әкімге қойылған сұрақ көп. Баспана мәселесі, көпбалалы аналарға төленетін жәрдемақылар туралы шағымдарын айта келген жұрт қарасы көп болды. Кездесуге келгендердің дені көпбалалы аналар. Көптің көкейінде жүрген баспана мәселесіне қала басшысы кеңірек тоқталды. Биыл млрд-таған қаржыға көп қабатты тұрғынжайлар салынбақ. Газ, су, жол мәселесі де қалада әлі өзекті болып тұр. Қала іргесі күн санап кеңейіп жатыр. Жаңа қоныстар пайда болды. Жергілікті билік саны көбейген елді мекендерді инфрақұрылыммен қамтамасыз етіп үлгермей жатыр. Қала іргесінен үй тұрғызғандар өркениетке тез іліксек деген өтініштерін айтты. Кездесуде айтылған мәселе көп. Билік өкілдері барлығын тыңдап, назарға алуға уәде берді. Кездесуге жеке сұрақпен келгендер де болды. Оларды жиыннан соң Асхат Шахаров бөлек қабылдады.