Коронавирус пандемиясына қатысты елімізде тазалыққа аса мән беріліп жатыр. Жолаушылар автобустарына дейін енді әр рейс сайын тазартылып тұруы қажет деген талап қойылды. Бұл туралы бүгін Орталық коммуникациялар қызметі алаңында өткен баспасөз мәслихатында денсаулық сақтау министрі Ержан Біртанов мәлімдеді. Ақтөбенің қоғамдық көліктерінде тазалыққа аса мән берілмейтін. Жер кепсе автобустардың іші көк шаңға баттасып жатады. Қыс, көктемде сірә балшық. Кейбірінің іші таңда рейске шығарда бір, кешке жұмыс біткен соң тағы бір рет жиналуы мүмкін. Кейбірінің сықпытына қарасаң, едені мен қабырғаларына зауыттан шыққалы таза су тимегендей. Енді денсаулық сақтау министрінің талабы бұлжытпай орындалады дегенге сену де қиын. Адамның денінің саулығы жеке бастың, айналаның тазалығынан басталады. Коронавирус дегенге жолаушы тасымалымен айналысатын кәсіпорындар қаншалықты маңыз бере қоярын?!
"Автопарк" ЖШС бүгін залалсыздандыру шарасы жөнінде емес басқа мәселені жеткізу үшін баспасөз мәслихатын өткізді. Ертеңнен бастап №6 және №25-ші автобустар жаңартылған кестемен қатынайтын болады. №6-шы бағыт Шанхай мен Батыс-2 ауданының арасын жалғайтын болса, №25-қоғамдық көлік Батыс-2 ауданы мен көне қала арасында байланыс орнатады. Әзірге әр бағытта ресейлік "Паз" маркалы 4-5 автобустан қатынайды. Алдағы уақытта қажеттілік туындап жатса, қоғамдық көліктер санын арттырамыз деп отыр. Сондай-ақ, жақын күндері №38-ші бағыттағы автобустың да қозғалыс кестесі оңтайландырылады. Ол "Заречный-4" пен көне қала арасында қатынайды. №43-ші автобус қазір Сазды ауылындағы "Бауырластар-1", "Бауырластар-2" тұрғын үй массивтеріне жолаушы тасып жүр. "Автопарк" ЖШС-інің автобустарына да электрондық билет жүйесі енгізілгелі жатыр. Валидаторлар осы айдың соңына дейін №1, 11, 3, 12-ші бағыттағы қоғамдық көліктерде іске қосылады. Кейін сатылай өзге автобустар да осы жүйеге көшіріледі. "Автопарк" қарамағында 420 автобус бар. Күніне оның тең 230-250-і ғана рейске шығады. Күн сайын 30-50 автобус жөндеуге қойылады. Жазға таман мекеме паркі үлкен сыйымдылықтағы жаңа автобустармен толығуы мүмкін.