Атышулы "Юнис сити" тұрғын үй кешеніне қатысты даудың кесірі жарымжан адамдарға да тиіп жатыр. Қалалық әкімдік осыдан 3 жыл бұрын осы "Юнис сити" тұрғын үй кешеніндегі үйлердің біріне баспана кезегінде тұрған көпбалалы отбасы, жалғызбасты аналар мен әкелерді, мүгедек адамдарды уақытша қоныстандырған. Құрылыс жүргізген компания осы үйлерді екінші деңгейлі банктердің біріне кепілге қойып, аса ірі көлемде несие алған. Қарыз өтелмей жатқандықтан банк кепілдегі үйлерді сатып, ақшасын қайтармақшы. Ал үйлерді уақытша паналап жатқандардан оны белгілі мерзім ішінде босату талап етілген. Көп адам далада қалайын деп тұр. "Юнис сити" тұрғын үй кешенін саларда құрылыс компаниясы үйлерді екінші деңгейлі банктердің біріне кепілге қойып, аса ірі көлемде несие алады. Кейін құрылыс компаниясымен ауыз жаласқан әділет басқармасының екі қызметкері жылжымайтын мүлікті заңсыз жолдармен банк кепілдігінен шығарып, астыртын фирмалар арқылы сатып жіберген. Алаяқтық ісі бойынша бірнеше адам сотталды. Құрылыс компаниясының басында тұрғандарға халықаралық іздеу жарияланды. Қазір банк қыруар шығынын өндіріп алу үшін кепілдегі үйлерді сатуға шығарып жатыр. Осындай үйлердің біріне осыдан үш жыл бұрын қалалық әкімдік баспана кезегінде тұрған әлеуметтік осал топқа кіретін отбастарын уақытша кіргізіп қойған.
Енді олар 25-ші мамырға дейін пәтерлерді босатулары керек. Гүлдәурен Құсайынова жалғызбасты ана. Бөгенбай батыр көшесіндегі №155-ші үйдің 2-ші ғимаратынан оған үйдің кезегі келгенде уақытша тұруға бір бөлмелі пәтер берілген. Бұл пәтерден қуылса, әйел баласымен далада қалады. Ал банк 1 бөлмелі пәтерді 4 миллион 800 мың теңгеге саудалап отыр. Гүлдәурен Құсайынованың қолында ондай ақша жоқ.
Қалалық әкімдік бұл үйге әлеуметтік осал топтағы 20 шақты отбасын уақытша қоныстандырған. Ал үйде әуел баста коммуникациялық желілер тартылмаған. Инфрақұрылымды пәтерлерге қоныстанғаннан кейін адамдардың өздері кіргізген. Қаланың бас сәулетшісі Сұлтан Аманшиннің сөзінше, екінші деңгейлі банктің тұрғындардан пәтерлерді босатуды талап етуі қисынсыз. Себебі заң бойынша құрылысы бітпеген үй қолдануға берілмейді, сатылмайды.
Қалалық тұрғын үй қатынастары бөлімінің басшысы Жандос Әлімов болса, банкке қарсы уәж айтуға құқымыз жоқ, дейді. Бұл адамдарға пәтерлерді сатып алу ұсынылған. Онымен ешбірінің ондай мүмкіндігі жоқ. Мәселен, Гүлшара Қалыбекованың бір күндік табысы 2000 теңге. Сол табысына әупірімдеп жүріп, уақытша тұрып жатқан пәтерін жөндеген. Тұрғындар пәтерлерді қарызға алуға келісіп отыр. Ақшаны пайызсыз, бөліп қайтаруға әзір. Жергілікті биліктің мәселеге араласуын сұрайды.