Аптап ыстықта тұрғындарға сая болған субұрқақтардан сән кетті. Уақытылы тазартылмайтындықтан, бұрқақтардың суы сасып, айналаға жағымсыз иіс таралуда. Ол аз дегендей, көшедегі кезбелер мен қайыршылар субұрқаққа келіп жуынатын болған. Ең сорақысы - сол суға балалар да шомылып жүр. Субұрқаққа шомылу - мәдениеттілікке жат. Ол өз алдына, бұрқақтан шашырап жатқан су таза емес. Бірнеше күнде бір ауыстырылады. Көгеріп, сасып кеткен судан айналаға жағымсыз иіс те таралып жатыр. Кереев көшесіндегі субұрқақтың да сәні мен мәні кетті. Күнделікті осында келіп демалатын тұрғындардың айтуынша, бұрқақ кезбелер мен қайыршылардың жуынатын жеріне айналған. Субұрқақтағы суды күндіз-түні күзету мүмкін емес. Бірақ, тәулік сайын тазартып тұру қолдан келетін шаруа. Субұрқақтарды күтіп-ұстайтын арнайы мекемелер осыны ескерсе, дейді тұрғындар. Қалада қазір әкімдіктің иелігіндегі 21 субұрқақ бар. Тағы соншасы - жекенің меншігінде.