Соңғы жылдары қалада жасыл желек азайып кетті. Осыған байланысты өткен сенбіде Триатлон паркінде тал отырғызу маусымы ашылды. Саябаққа 2500-ден астам жас көшет егіледі. Қазіргі таңда қаланың өзекті мәселесінің бірі - экология. Осы мәселенің түйінін тарқатуға үлесімді қосамын дегендердің бірі "Әлжановтар" отбасы. Бану Жолмағамбетова "Триатлон" саябағында ағаш отырғызу хабарландыруын "Актобе, дыши" инстаграм желісінен көрген. Ал отағасы Біржан Әлжанов берекелі істен қалыс қалмау керек, дейді.
Ақтөбенің жазы ыстық, қуаң, аңызақ желі мен шаңды дауылы тағы бар. Қалада жасыл желекке жұтаң жерлер көп. Бүгінге дейін "Триатлон" саябағында 200-ден астам жас көшет егілген. Биылғы жоспар бойынша паркке 2000-нан астам ағаш отырғызылады. Биыл қала бойынша 25 мың түп ағаш отырғызылады. Одан бөлек 14 демалыс аймағы абаттандырылады. Олардың көбі қаланың шет аудандарында, елді мекендерде орналасады.Шаһарды көгалдандыруға атсалысқан еріктілер барша халықты қоршаған ортаны қорғап, табиғатты аялауға шақырды. Олар тазалық акциясына қатысушылардың саны арта түсеріне сенімді.