101-атқыштар бригадасы көшесі кешкі мезгілде жаяу жүргіншілерге арналған аллеяға айналды. Көше аббаттандырылып, кешкі сағат 8-ден таңғы 6-ға дейін автокөліктердің қозғалысы шектеледі. Тек жедел жәрдем мен өрт сөндіру көліктеріне жүруге рұқсат етілген. Кеше кешке жаңа аллеяның ашылуына қала әкімі Асхат Шахаров қатысып, жобаның мүмкіндігі шектеулі жандар үшін, балалар мен жалпы жаяу жүргіншілер үшін қолайлы екенін атап өтті.
101-атқыштар бригадасы көшесіне жаңа жарықшамдар, қоқыс жәшіктері мен орындықтар, декоративті шамдар және жарықшамдармен безендірілген субұрқақ орнатылған. Енді күн сайын кешкі мезгілде көшенің екі жағына боллардтар қойылып, көлік қозғалысы шектеледі. Тек жедел-жәрдем мен өрт сөндіру көліктеріне ғана өтуге рұқсат. "Қала тек автокөлік үшін ғана емес, жаяу адамдар үшін де қолайлы болуы керек", -деген қалабасы болашақта осындай орындарды қаланың шеткері аудандарында, елдімекендерде көбірек ұйымдастыратынын айтты. 101-ші атқыштар бригадасы көшесіндегі жаңа аллеяда «Бауырсақ», «Періште қанаты», «Саптыаяқ», «Дастархан» сияқты шағын архитектуралық мүсіндер де қойылған. Сондай-ақ, осы көшеге қарап тұрған көп қабатты үйлердің қасбеттері түрлі түске боялып, мурал-суреттер салынған. Жуырда көпжылдық шөптер де егіледі. Айта кетейік, қыс мезгілінде бұл көшеде жол қазғалысы шектеле ме, жоқ па, белгісіз. "Әзірге тек жылы мезгілде көшені жабуды көздеп отырмыз. Көпшіліктің пікіріне қараймыз, ешкімді назардан тыс қалдырмаймыз", - деді қала әкімі Асхат Шахаров.