Бүгін қалалық жұмыспен қамту орталығында бос орындар жәрмеңкесі өтті. Шағын жәрмеңкеде 268 мамандық бойынша 25 кәсіпорын жұмыс ұсынды. Кондитер, сатушы, инженер, сантехник және слесарьларға сұраныс көп. Жұмыс іздеп келгендердің дені - зейнет жасына таяп қалған ақтөбеліктер. Сондай - ақ кәсібін ауыстырғысы келген тұрғындар. Ал қала бойынша 500- ден аса жұмыссызды қалаған кәсіпорындарына орналастыру мүмкін болмай тұр. Қалалық жұмыспен қамту орталығы директорының міндетін атқарушы Эльмира Омарованың айтуынша, екі тараптың талаптары сәйкес келмейді. Орталық мамандары былтыр техникалық колледждерді тәмамдаған алпыс түлекті ұзақ мерзімді оқыту курстарына шақырады. Көбінесе ауыл шаруашылық саласы бойынша мамандар даярлау көзделіп отыр. Кәсіби мамандық алып шығуға ниет білдіргендерге айына 12 мың теңге шәкіртақы тиесілі. Оқу мерзімі 2 жыл алты ай. Бүгіннен бастап 2011 жылы бітірген түлектерден өтініштер қабылданады.